Mother’s Day Fine Dining

Every Muddah’s Day, my fahdah, tell, we going out fo dinner. Only ting, he only like eat Chinese food. Instead of going one regular chop suey house, he tell we going Waikiki Lau Yee Chai. My bruddah tell, “We going Waikiki Lousy Chai again.” We gotta wear shoes and nice aloha shirt. When we get dere, my fahdah order da same stuff as at da chop suey house. Only mo expensive and most of da dishes not chipped. Da boss sit by da cash register and watch me and Russo, like we going steal something. Same as chop suey house.