Red Lace Bevadeez

One tita
stay
carving
into da
banyan tree
next to da
Hygenic Store.

She waitin on Kimo
da kine moke neva even
graduate Castle High School.

Da tita
get one zit da size
of one forklift
on top her
nose.
Pretty soon
she going pop dat bugga
da ting going ooze
and she going use 'um fo
fill-in da kine words
into dat tree.
Gross-yea?

Words like
I gonna get you fo dis, KIMO.
I not playin wit you
no more games– gangsta.
I like wrap your brains round dis tree.
Wat you tink, I no life?
You tink I
going stay hea waitin foreva?

So she tink sum more and she write
sum ting else into dat tree
dat no one eva going forget.

It say,
Kimo like sleep
wit ladies undawea on cuz
he got one ting for — red lace bevadeez.

Dat going fix da bugga.

She smiling now
like she wen release
one huge
stinkin fut.

“Kay den,” she say
to me
“my work
hea pau
wea you like go?”